Moji prvi novinarski koraci vezani su za dnevni list “Dan” nakon kojih sam krenula u televizijsku avanturu. Ozbiljnije novinarsko iskustvo sticala sam na MBC TV, a potom sam svoje znanje dodatno usavršavala na TV7, gdje sam nastavila da gradim prepoznatljiv stil i profesionalni pristup.

Već 19 godina sam, kažu, “poznato lice s malih ekrana”. Vedra sam i nasmijana, ali sam uvijek i spremna da se uhvatim u koštac i s najozbiljnijim temama.

Verujem da su novinarski izazovi možda slični, ali da nam pristup uvijek mora biti isti – istinito, profesionalno i provjereno izvještavanje.

Između dvije televizijske kuće oprobala sam se i na radiju ali TV je TV.

Dobitnica sam brojnih priznanja i zahvalnica, a posebno bih izdvojila plaketu za doprinos profesionalnom izveštavanju i razvoju crnogorskog novinarstva, koju mi je 2024. godine dodijelilo Društvo crnogorskih novinara, kao i ovogodišnje specijalno priznanje “Iskra” za medijski doprinos filantropiji, uručeno od strane Fonda za aktivno građanstvo – priznanje koje u meni izaziva posebnu emociju, zahvalnost i odgovornost.

Uvijek me možete prepoznati po tačnosti, predanosti i lojalnosti, vrlo sam emotivna, iskrena i uvijek puna ljubavi. Verujem u vedrinu duha i njegujem dijete u sebi, jer ono čuči u svima nama.

Engleski govorim kao maternji, a ni španski mi nije stran.